ସୃଜନର କାଠ ଗଡାରେ ତିନି ସ୍ରଷ୍ଟା! (୨)

ନବନୀତା ବ୍ୟୁରୋ। ଗାଳ୍ପିକ ଗିରି ଦଣ୍ଡସେନା । ଓଡ଼ିଆ କଥା ସାହିତ୍ୟରେ ଏକ ଶ୍ରଦ୍ଧାଶୀଳ ଉଚ୍ଚାରଣ । ଜୀବନ ଓ ଜଗତକୁ ଭଲ ପାଉଥିବା ଜଣେ ଦରଦୀ ସ୍ରଷ୍ଟା ସେ । ତାଙ୍କ ଗଳ୍ପର ଚରିତ୍ର ଗୁଡ଼ିକ ଅତି ସାଧାରଣରୁ ସାଧାରଣ । ସମାଜର ବିଭିନ୍ନ ବର୍ଗର ଚରିତ୍ର ଚିତ୍ରିତ ହୋଇଥାଆନ୍ତି ତାଙ୍କ ଗଳ୍ପଗୁଡ଼ିକରେ । ଚମତ୍କାର କାହାଣୀ, ମାର୍ମିକ ଉପସ୍ଥାପନା ଶୈଳୀ, ଚରିତ୍ର ଚିତ୍ରଣରେ ଅପୂର୍ବ ଦକ୍ଷତା ତାଙ୍କ ଗଳ୍ପଗୁଡ଼ିକ ପାଠକକୁ ଆକର୍ଷିତ କରିଥାଏ । ଆତ୍ମିକ ଓ ଆଙ୍ଗିକ ଉଭୟ ଦୃଷ୍ଟିରୁ ଗାଳ୍ପିକ ଗିରି ଦଣ୍ଡସେନାଙ୍କ ଗଳ୍ପଗୁଡ଼ିକ ସଫଳ । ତାଙ୍କ ରଚିତ ‘କାଳସୂତ୍ର’, ‘ଭୂମିଗର୍ଭା’, ‘ଓଡ଼ିଶୀ ଓଡ଼ିସୀ’, ‘ପ୍ରବାଦ ପୁରୁଷ’, ‘ରାସ୍ତା କଡ଼େ ଜୀବନ’, ‘ଅନାର୍ଯ୍ୟ ଦାସ’ ପ୍ରଭୃତି ଗଳ୍ପ ପୁସ୍ତକ ବହୁ ପାଠକୀୟ ଆଦୃତି ଲାଭ କରିଛି । ବିଭିନ୍ନ ସାହିତ୍ୟ ଓ ସାଂସ୍କୃତିକ ସଂଗଠନ ସହିତ ମଧ୍ୟ ସେ ଜଡ଼ିତ । ଓଡ଼ିଆ କଥା ସାହିତ୍ୟକୁ ତାଙ୍କର ଉଲ୍ଲେଖନୀୟ ଅବଦାନ ପାଇଁ ସେ ବିଭିନ୍ନ ଅନୁଷ୍ଠାନ ପକ୍ଷରୁ ପୁରସ୍କୃତ ଓ ସମ୍ମାନିତ । ସଂପ୍ରତି ସେ ଓଡ଼ିଶା ସାହିତ୍ୟ ଏକାଡେମୀର ଉପ ସଭାପତି ପଦରେ ଅଧିଷ୍ଠିତ । ଆତ୍ମ ପ୍ରଚାର ଓ ପ୍ରସାରଠାରୁ ବହୁ ଊର୍ଦ୍ଧ୍ୱରେ ଏହି ନିରବ ସାହିତ୍ୟ ସ୍ରଷ୍ଟା । କଥାକାର ଗିରି ଦଣ୍ଡସେନାଙ୍କ ସୃଜନଶୀଳ କୃତି ଓ ସାରସ୍ୱତ ଜୀବନକୁ ନେଇ ନବନୀତା ପକ୍ଷରୁ ଉପସ୍ଥାପନ କରୁଛୁ ସ୍ଵତନ୍ତ୍ର ସାକ୍ଷାତାକାର । – ସମ୍ପାଦକ