ସୃଜନର କାଠ ଗଡ଼ାରେ ତିନି ସ୍ରଷ୍ଟା!

ଓଡ଼ିଆ ସାହିତ୍ୟକୁ ପଶ୍ଚିମ ଓଡ଼ିଶାର ଅବଦାନ ଏକାନ୍ତ ସ୍ମରଣୀୟ । ପଶ୍ଚିମ ଓଡ଼ିଶାର ବହୁ ବରେଣ୍ୟ ସ୍ରଷ୍ଟାଙ୍କ ଲେଖନୀରେ ଋଦ୍ଧିମନ୍ତ ହୋଇଛି ଓଡ଼ିଆ ଭାଷା ଓ ସାହିତ୍ୟ । ଏବେ ମଧ୍ୟ ପଶ୍ଚିମ ଓଡ଼ିଶାର ଶହଶହ ସାହିତ୍ୟ ସ୍ରଷ୍ଟା ଓଡ଼ିଆ ଭାଷାସାହିତ୍ୟରେ ସାଧନାରତ । ପଶ୍ଚିମ ଓଡ଼ିଶାରେ ସମ୍ବଲପୁରୀ/କୋଶଲି ଭାଷା ପ୍ରଚଳିତ । ତଥାପି ଓଡ଼ିଆ ଭାଷା ସାହିତ୍ୟର ପ୍ରଚାର ଓ ପ୍ରସାର ପାଇଁ ପଶ୍ଚିମ ଓଡ଼ିଶାର ଅନେକ କବି, ଲେଖକ ଅଙ୍ଗୀକାରବଦ୍ଧ । ସେଇ ମହାନ୍ ସ୍ରଷ୍ଟାମାନଙ୍କ ଲେଖନୀ ମୁନରୁ ନିଃସୃତ ହୋଇଛି ବହୁ କାଳଜୟୀ କୃତି । ଯାହା ଓଡ଼ିଆ ସାହିତ୍ୟର ପରମ ସଂପଦ । ତେବେ ପଶ୍ଚିମ ଓଡ଼ିଶାର ବହୁ ସାହିତ୍ୟିକ ଏବେ ବି ଅବହେଳିତ ଓ ଅନାଲୋଚିତ ହୋଇରହିଛନ୍ତି । ଯେଉଁମାନଙ୍କ କୃତି ସଂପର୍କରେ ବିଶେଷ ଆଲୋଚନା ହୋଇପାରିନାହିଁ । ସେମାନଙ୍କ ସାରସ୍ୱତ ସାଧନା ଓ ସୃଜନଶୀଳ ଜୀବନ ସଂପର୍କରେ ଠିକ୍ ଭାବେ ତର୍ଜମା କରାଯାଇନାହିଁ । ତେଣୁ କୈଶୋର କାଳରୁ ନିରବଚ୍ଛିନ୍ନ ଭାବେ ଲେଖନୀ ଚାଳନା କରିଆସୁଥିବା ପଶ୍ଚିମ ଓଡ଼ିଶାର ତିନି ଜଣ ବରିଷ୍ଠ ସାହିତ୍ୟ ସାଧକଙ୍କ ଜୀବନ ଓ ସୃଜନକୁ ନେଇ ‘ନବନୀତା’ ପକ୍ଷରୁ ପ୍ରସ୍ତୁତ କରାଯାଇଛି ଏକ ସ୍ୱତନ୍ତ୍ର ସାକ୍ଷାତକାର । – ସମ୍ପାଦକ

ଉପସ୍ଥାପନା: ଅଧ୍ୟାପକ ସତ୍ୟଜିତ ଦାସ

୧. ଆପଣ ସାହିତ୍ୟର ସବୁ ବିଭାଗରେ ଲେଖନୀ ଚାଳନା କରିଛନ୍ତି । କେଉଁ ବିଭାଗଟି ଆପଣଙ୍କର ଅଧିକ ପ୍ରିୟ?

ମଂଗଳୁ ବିଶ୍ୱାଳ: ମୁଁ ମୋର ଗଦ୍ୟ ପାଇଁ ଗର୍ବ କରେ ନାହିଁ । କବିତା ହେଉଛି ଗୋଟିଏ ‘ଲୁସିଡ୍‌ଥିଙ୍କ’ । ମୋର ପ୍ରିୟ ବିଭାଗ ହେଉଛି ‘କବିତା’ ।