ନବନୀତା ବ୍ୟୁରୋ। ଜେଲରୁ ବାହାରିଲା ପାଟଣାଗଡ ପାର୍ସଲ ବୋମା ବିସ୍ଫୋରଣ ଘଟଣାର ମୁଖ୍ୟ ଖଳନାୟକ ପୁଞ୍ଜିଲାଲ୍ ମେହେର। ମାଙ୍କ ଶୁଦ୍ଧିକ୍ରିୟା ପାଇଁ ବଲାଙ୍ଗିର ଜେଲରୁ ବାହାରିଛନ୍ତି ପୁଞ୍ଜିଲାଲ। ଏଥିପାଇଁ ଉଚ୍ଚ ନ୍ୟାୟାଳୟ ତାଙ୍କୁ ୪ ଦିନିଆ ସର୍ତମୂଳକ ଅନ୍ତରୀଣ ଜାମିନ ଦେଇଛନ୍ତି। ୨୪ ତାରିଖରୁ ୨୮ ଯାଏ ମାଙ୍କ ଶୁଦ୍ଧିକ୍ରିୟା ସାରି ପୁଣି ଜେଲକୁ ଫେରିବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ। ତେବେ ଏ ସମୟରେ ଗଣମାଧ୍ୟମ ସାମ୍ନାରେ କୌଣସି ମନ୍ତବ୍ୟ ନ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ପୂର୍ବରୁ ଗତ ୧୨ ତାରିଖରେ ଦିନକ ପାଇଁ ଜାମିନରେ ଆସି ମାଙ୍କ ଅନ୍ତେଷ୍ଟିକ୍ରିୟା ସାରି ପୁଣି ଜେଲକୁ ଆସିଥିଲେ ପଞ୍ଜିଲାଲ। ହେଲେ ଏ ସମୟରେ ଗଣମାଧ୍ୟମ ଉପରେ ଜୋର୍ ବର୍ଷି ଥିଲେ ପଞ୍ଜିଲାଲ୍।
ପ୍ରକାଶଯୋଗ୍ୟ ଯେ, ଗତ ୨୦୧୮ ମସିହା ଫେବୃଆରୀ ୨୩ ତାରିଖରେ ପାଟଣାଗଡ ବ୍ରହ୍ମପୁରାରେ ପାର୍ସଲ ବୋମା ବିସ୍ଫୋରଣ ଘଟିଥିଲା। ଏଥିରେ ସୋମ୍ୟଶେଖର ଓ ତାଙ୍କ ଜେଜେମାଙ୍କ ମୃତ୍ୟୁ ଘଟିଥିଲା ବେଳେ ରୀମା ଗୁରୁତର ଆହତ ହୋଇଥିଲେ। ଗୁରୁତର ରୀମାଙ୍କୁ ପ୍ରଥମେ ବୁର୍ଲା ଓ ପରେ କଟକ ବଡ ମେଡିକାଲ ସ୍ଥାନାନ୍ତତ କରାଯାଇଥିଲା। ସେଠାରେ ଦୀର୍ଘ ଦିନ ଧରି ଚିକିତ୍ସା ହେବା ପରେ ଘରକୁ ଫେରିଛନ୍ତି ରୀମା। ସେପଟେ ଏ ଘଟଣାର ମୁଖ୍ୟ ଖଳନାୟକ ପୁଞ୍ଜିଲାଲ ମେହେର ବଲାଙ୍ଗିର ଜେଲରେ ସଜା କାଟୁଛନ୍ତି।